Հաճախ տրվող հարցեր

Հարց. առաքու՞մ եք արդյոք նույն օրը

Պատասխան. առաքում ենք: Առաքում ենք նաև ճանապարհից (շատ ավելի արագ, քան նույն օրը): Ուղղակի որոշ դեպքերում գործում են հավելավճարներ, խնդրում ենք կապնվել մեզ հետ՝ մանրամասները ճշտելու համար:

Հարց. ջուրը տեղադրելուց հետո քանի՞ օրում պետք է շիշը սպառել

Պատասխան. նոր շիշը տեղադրելուց հետո ցանկալի է այն սպառել ամենաուշը 25 օրվա ընթացքում: Բանը նրանում է, որ բացելուց հետո շշի մեջի ջուրը շփվում է օդի հետ (օդը մտնում է դիսպենսերի բաքերի մեջ, այդտեղից էլ շշի մեջ): Մեր կողմից խորհուրդ տրվող 25-օրյա ժամկետը նորմատիվային չէ, այն հիմնված է մեր փորձի վրա:

Հարց. ո՞րն է JurJur-ի, Բյուրեղի և Մաքուր Ջուր-ի տարբերությունը

Պատասխան. Բյուրեղը շշալցվում է Ջերմուկ քաղաքում, ուղղակի աղբյուրից (աղբյուրի պաշտոնական անվանումն է Ջերմուկի տեղանքի թիվ 1 աղբյուր), այն որակվում է բնական աղբյուրի ջուր: Մաքուր Ջուր-ը շշալցվում է Կաթնաղբյուրում (Ակունք գյուղի ադմինիստրատիվ տարածք), և նույնպես որակվում է բնական աղբյուրի ջուր, քանի որ շշալցվում է ուղղակի աղբյուրից: JurJur-ը շշալցվում է Երևան քաղաքի Էրեբունի համայնքում, Գառնու ջրատարից՝ անցնելով ակտիվացված ածուխով ֆիլտրացիոն քլորազտման և հավելյալ մանրէազերծման փուլեր, այն որակվում է բարձրորակ խմելու ջուր:

Հարց. ինչու՞ Բյուրեղ կամ Մաքուր Ջուր օգտագործելիս ջրում երբեմն նկատվում են սպիտակ փաթիլներ, իսկ JurJur օգտագործելիս դրանք չեն նկատվում

Պատասխան. սպիտակ փաթիլների ամենահաճախ հանդիպող պատճառը ջրի հանքային կազմն է. հատկապես ցուրտ եղանակին (կամ դիսպենսերի սառը ջրի բաքի մեջ) ջրում առկա հանքային աղերի մոլեկուլները միտում ունեն իրար միանալու, այսպես ասած "կլաստերներ կազմելու", հենց այդ կլաստերներն էլ երբեմն տեսնում ենք փաթիլների տեսքով: Բյուրեղի և Մաքուր Ջուր-ի (և շատ ուրիշ լեռնային տեղանքից ծագող բնական աղբյուրի ջրերի) հանքային կազմն այնպիսին է, որ ցածր ջերմաստիճաններում կլաստերիզացիան ավելի արագ է կատարվում, հետո սենյակային ջերմաստիճանի "վերադառնալուց" հետո այդ հանքային աղերի մոլեկուլների կլաստերները հետ չեն տարրալուծվում: Իսկ JurJur-ի հանքային կազմն այնպիսին է, որ կլաստերիզացման միտումն ավելի թույլ է. պետք է շատ ավելի ցածր ջերմաստիճան և տևական ժամանակ: Կարևոր է հիշելը, որ այս պատճառով առաջացացող սպիտակ փաթիլները աղտոտվածության նշան չեն, դրանք ուղղակի հանքային բաղադրության և ջերմաստիճանային տատանումների հետ են կապված:

Հարց. դիսպենսեր սարքի ծորակներից բաժակի մեջ լցնելիս ջրի մեջ նկատվում են հատիկներ, սպիտակ փաթիլներ, բայց շշի մեջ դրանք չկան - ինչու՞մն է բանը

Պատասխան. երբ դիսպենսերի բաքերը կիսադատարկ են, և տեղադրվում է նոր շիշ, առաջանում է ջրի տուրբուլենտություն (այդ մասին կարելի է տեղեկանալ, եթե շշի տեղադրումից հետո շատ ջուր է լցվում բաքերի մեջ, և մեծ քանակի պղպջակներ են նկատվում): Այդ տուրբուլենտությունից սառը ջրի բաքի հատակին հավաքված փոշին/աղտոտվածությունը, ինչպես նաև ցածր ջերմաստիճանի պարագայում (չէ որ բաքը սառեցնող է) առաջացած հանքային աղերի կլաստերները (սպիտակ փաթիլների տեսքով) բարձրանում են ջրհավաք մակարդակից բարձր (այսինքն, դեպի ծորակները եկող խողովակի մակարդակից բարձր - այդ խողովակը սկսվում է բաքի հատակից մի քանի սանտիմետր բարձր՝ բաքի պատի վրայից), այդ պատճառով նշված հատիկները/սպիտակ փաթիլները բաժակի մեջ նկատվում են շիշը փոխելուց անմիջապես հետո: 

Խորհուրդ. շիշը դատարկվելուց հետո ջուր մի վերցրեք ծորակներից, որպեսզի բաքերը չդատարկվեն: Անմիջապես տեղադրեք նոր լիքը շիշ: Երբ բաքերը լի են ջրով, քչանում է դրանց մեջ օդ (և աղտոտվածություն) ներթափանցելու հավանականությունը: Ավելին, դատարկ դիսպենսերի բաքերի տաքանալը և սառչելը կարող է վնասել բաքերի մետաղը:

Դիսպենսերները հերմետիկ չեն, և դրանք չեն ինքնամաքրվում: Դիսպենսերի վերևի հատվածը (ձողը և դրա շրջակայքը) առավել ռիսկային են աղտոտման տեսանկյունից, հաճախ են աղտոտվում նաև ծորակները, դրանց ներքևի մասի կաթամանը: Ջրի բաքերը (հատկապես սառը ջրի բաքը) օդի հետ շփում ունի, հենց այդ օդն է մտնում բաքի մեջ, այնուհետև պղպջակի տեսքով երևում շշի ներսում, երբ բաքի մեջ շշից ջուր է լցվում: Ինչքան աղտոտված կամ փոշոտ է տարածքի օդը, այնքան ավելի մեծ է դիսպենսերի սառը ջրի բաքի աղտոտման հավանականությունը: Անհրաժեշտ է տարեկան առնվազն երկու անգամ կազմակերպել դիսպենսերի սանիտարական մաքրում, մեր կայքում կա հատուկ հոլովակ, որը կօգնի սան. մաքրումն ինքնուրույն անել:

Սպիտակ փաթիլներ կարող են առաջանալ նաև սառը ջրի բաքում սառույց առաջանալուց: Անհրաժեշտ է դա կանխել՝ դիսպենսերի ետնամասում ջերմաստիճանի կարգավորիչի միջոցով:

Հարց. ու՞մ են պատկանում Բյուրեղ և Մաքուր Ջուր ապրանքային նշանները

Պատասխան. Բյուրեղ ապրանքային նշանը պատկանում է Ջերմուկ Գրուպ ՓԲ ընկերությանը, Մաքուր Ջուր ապրանքային նշանը պատկանում է ՄԳԱ Վոթըր ՍՊ ընկերությանը: Էվրի Դեյ ՓԲ ընկերությանը պատկանում է JurJur ապրանքային նշանը, մենք հանդիսանում ենք "Բյուրեղ 19 լիտր" ապրանքային նշանի էքսկլյուզիվ լիցենզառու և Մաքուր Ջուր ապրանքային նշանի ապրանքների էքսկլյուզիվ վերավաճառող: Բյուրեղ 19լ ապրանքատեսակը շշալցվում է Ջերմուկ քաղաքում Ջերմուկ Գրուպ ընկերության գործարանում՝ Էվրի Դեյ ընկերության կողմից վարձակալված արտադրական հզորություններով: Բյուրեղ 19լ ապրանքատեսակի արտադրության համար օգտագործվում է նույն հումքային ջուրը, ինչը և օգտագործվում է Բյուրեղ 0.33լ, Բյուրեղ 0.5լ, Բյուրեղ 1.5լ, Բյուրեղ 3լ և Բյուրեղ 5լ ապրանքատեսակների արտադրության համար: Մաքուր Ջուր 18.9լ ապրանքատեսակը շշալցվում է Կաթնաղբյուրում (Ակունք գյուղի ադմինիստրատիվ տարածքում) Մուլտի Ակվամարին ընկերության գործարանում՝ ՄԳԱ Վոթըր ընկերության կողմից վարձակալված արտադրական հզորություններով: 

Հարց. ո՞րն է երեք տարբեր ջուր առաքելու նպատակը

Պատասխան. երբ մենք հիմնադրվեցինք 2008 թվականին, շշալցնում էինք միայն Բյուրեղ 19լ: Ջերմուկից Երևան ջրի տեղափոխումը ահռելի լոգիստիկ ծախս է: Առաջին մի քանի տարիների ընթացքում խոշոր կորպորատիվ հաճախորդների կողմից հնչեցին շարունակական խնդրանքներ բարձրորակ, բայց առավել մատչելի ջուր մատակարարելու վերաբերյալ: 2012 թվականին, մանրամասն վերլուծելով Երևան քաղաքի ջրամատակարարման որակը և հատկապես այդ որակի կայունությունը, որոշում կայացվեց բացել երկրորդ արտադրամասը, որն ի սկզբանե զինվեց գերժամանակակից ֆիլտրացիոն և արտադրական սարքավորմամբ: Մեկ-երկու տարվա ընթացքում JurJur 19լ ապրանքատեսակը վստահություն ներշնչեց հիմնական կորպորատիվ սպառողներին, ինչպես նաև բազմաթիվ բնակարանային սպառողներ սկսեցին պատվիրել JurJur 19լ և ավելի թեթև JurJur 12լ ապրանքատեսակները:

2017 թվականին համագործակցություն սկսվեց ՄԳԱ Վոթըր ընկերության հետ, որի շրջանակներում միավորվեցին Մաքուր Ջուր, JurJur և Բյուրեղ 19լ ապրանքատեսակների գծով պատվերների ընդունման և առաքման գործառույթները՝ լոգիստիկ արդյունավետության բարձր աստիճանի հասնելու նպատակով: Երեք տարբեր ջուր առաջարկելով մենք մեր հաճախորդներին տալիս ենք ընտրության լայն հնարավորություն՝ հաշվի առնելով յուրաքանչյուր ապրանքատեսակի առանձնահատկությունները, միևնույն ժամանակ անում ենք հնարավորը՝ բոլոր ապրանքատեսակների գծով պատվերների ընդունման և առաքման բարձր մակարդակ ապահովելու նպատակով: 

Հարց. երբեմն նոր տեղաղրված ջրից քլորի համ է գալիս, ի՞նչն է պատճառը:

Պատասխան. Կան անբարեխիղճ հաճախորդներ, ովքեր մեր շշերի մեջ լցնում են սովորական ծորակի ջուր և տեղադրում են դիսպենսերի վրա: Այլ ջուր մեր շշի մեջ լցնելն արգելվում է պայմանագրով: Երբ մենք նկատում ենք, որ հաճախորդներից մեկը երկար ժամանակ է, ինչ ջուր չի պատվիրում, խնդրում ենք նրան վերադարձնել մեր շշերը: Ցավոք այդ շշերից շատերին արդեն "կպած" է լինում ծորակի ջրի համը: Շշալցումից առաջ ստուգվում են բոլոր շշերը, և եթե շշից ուժեղ քլորի հոտ է գալիս, մենք այդ շիշը խոտանում ենք, բայց թույլ հոտը, ցավոք, հնարավոր չի լինում 100% ստուգել: Այդ հազվադեպ դեպքերում շշից համը փոխանցվում է ջրին: Մենք շարունակաբար բարելավում ենք դատարկ շշերի վերադարձելիության վերահսկողությունը, որպեսզի այս խնդիրը վերացնենք:

 

Հարց. դիսպենսերներն իրենց մեջ ունե՞ն ֆիլտրեր

Պատասխան. դիսպենսերներն իրենց մեջ ֆիլտրեր չունեն, քանի որ նախատեսված են արտադրական շշալցման համար մշակված ջրի համար (մեր կողմից առաքվող ջուրն արդեն իսկ ֆիլտրված է): Սարքերի վրա չի կարելի տեղադրել ծորակի ջրով լցված շշեր, քանի որ ծորակի ջուրն իր մեջ պարունակում է քլոր, որի համը փոխանցվում է սարքի այն ջրատար ուղիներին, որոնք պլաստիկից են (ծորակներ, սառը ջրի խողովակ, ձող, և այլն):

Հարց. ո՞րն է դիսպենսերի տեղադրման համար ամենանպաստավոր տեղը սենյակում

Պատասխան. դիսպենսերն ԱՆՊԱՅՄԱՆ պետք է տեղադրել արևի ճառագայթներից և տնային բույսերից հեռու:

Հարց. մենք ունենք այլ մատակարարից ձեռք բերված դիսպենսեր սարք, արդյոք ձեր շշերը կկարողանանք օգտագործել?

Պատասխան. շշերի խցանները (կափարիչները) ստանդարտ բացվածք ունեն, հազվադեպ են պատահում դիսպենսերներ, որոնց վրա հնարավոր չի լինում տեղադրել մեր շշերը: Մեր բազմահազարանոց հաճախորդների բազմության մեջ, 2008 թվականից ի վեր, մեկ-երկու դեպք է հանդիպել: Հիմնական դիսպենսերները և շշերի խցանները համընկնում են:

Հարց. Ի՞նչքան է սարքի սառեցման և տաքացման աստիճանները:

Պատասխան. WFD-410L, WBF-1000LA և WFD-1050 մոդելի դիսպենսերներում տաք ջրի ջերմաստիճանն է 75-90 ºC, իսկ սառը ջրի ջերմաստիճանը` 4-12 ºC: Սառը ջրի ջերմաստիճանը հնարավոր է փոփոխել դիսպենսերի ետնամասում գտնվող անջատիչների կողքի կարգավորիչով:

 

Հարց. կարո՞ղ ենք միայն հավելյալ ապրանքներ պատվիրել

Պատասխան. իհարկե կարող եք: Միայն հավելյալ ապրանքների պատվերի դեպքում գործում է առաքման հավելավճար` 600 ՀՀ դրամ, իսկ ջրի պատվերի հետ միասին`առաքումն անվճար է: 20,000 ՀՀ դրամ և ավելի հավելյալ ապրանքների գնման դեպքում ևս առաքումն անվճար է:

Հարգելի հաճախորդ 2016թ.-ի Հոկտեմբերի 25-ից պատվերները www.Jur.am կայքով կատարելու դեպքում Դուք կկուտակեք Բունուսային Բալեր:

Բոնուսային բալեր կուտակելու համար Ձեզ հարկավոր է լինել Jur.am-ի հաճախորդ և պատվերները կատարել առցանց: Բոնուսային բալեր կուտակվում են միայն առցանց կատարված պատվերների դեպքում՝ ըստ յուրաքանչյուր ապրանքատեսակի համար նշված բալերի քանակի:

 1 Բալ = 1 դրամ

 Կուտակված Բալերով Դուք կարող եք Ձեռք բերել ցանկացած ապրանք մեր կայքից:

Բալերի օգտագործման մի քանի կանոն`

  1. Բալերով ապրանք գնելիս հարկավոր է պատվերի նշումներ դաշտում ավելացնել, որ տվյալ ապրանքի համար ցանկանում եք վճարել Բալերով:
  2. Բալերը չեն փոխանակվում կանխիկ դրամի:
  3. Բալերով ապրանք գնելիս պետք է տվյալ ապրանքի ամբողջ արժեքը վճարվի Բալերով, այն չեք կարող լրացնել կանխիկ գումարով կամ փոխանցումով:
  4. Բալերը զրոյանում են մեկ և ավել տարի կայքով պատվերներ չկատարելու դեպքում:
  5. Բալերը մեկ հասցեից մյուս հասցե, կամ մեկ հաճախորդից մյուս հաճախորդին չեն տեղափոխվում:
  6. Բալեր չեն կուտակվում, եթե նշված ապրանքի համար հաճախորդն ունի հատուկ զեղչ:
  7. Բոնուսային ծրագրի համար ժամկետ սահմանված չէ: Ընկերությունն իրավունք ունի, 30 օր առաջ տեղեկացնելով իր հաճախորդներին, դադարեցնել Բոնուսային ծրագիրը` պաշտոնական կայքում հայտարարություն տեղադրելու միջոցով: 
Հարց. ե՞րբ է հիմնադրվել Ընկերությունը
 
Պատասխան. հիմնադրվել ենք 2008 թվականին, առաջին առաքումն իրականացրել ենք 2008թ նոյեմբեր ամսին:
 
Հարց. ե՞րբ եք սկսել արտադրել JurJur ապրանքանիշով խմելու ջուր
 
Պատասխան. 2012 թվականին, խոշոր կորպորատիվ հաճախորդների խնդրանքով (նրանց անհրաժեշտ էր բարձրորակ, բայց մատչելի խմելու ջուր): 2015 թվականին սկսեցինք արտադրել նաև փոքր պլաստիկ շշերով JurJur ապրանքանիշի խմելու ջուր:
 
Հարց. ու՞մ են պատկանում Բյուրեղ և Մաքուր Ջուր ապրանքային նշանները

Պատասխան. Բյուրեղ ապրանքային նշանը պատկանում է Ջերմուկ Գրուպ ՓԲ ընկերությանը, Մաքուր Ջուր ապրանքային նշանը պատկանում է ՄԳԱ Վոթըև ՍՊ ընկերությանը: Էվրի Դեյ ՓԲ ընկերությանը պատկանում է JurJur ապրանքային նշանը, մենք հանդիսանում ենք նաև "Բյուրեղ 19 լիտր" ապրանքային նշանի էքսկլյուզիվ լիցենզառու: Բյուրեղ 19լ ապրանքատեսակը շշալցվում է Ջերմուկ առողջարանային քաղաքում, Ջերմուկ Գրուպ ընկերության գործարանում՝ Էվրի Դեյ ընկերության կողմից վարձակալված արտադրական հզորություններով: Բյուրեղ 19լ ապրանքատեսակի արտադրության համար օգտագործվում է նույն հումքային ջուրը, ինչը և օգտագործվում է Բյուրեղ 0.33լ, Բյուրեղ 0.5լ, Բյուրեղ 1.5լ, Բյուրեղ 3լ և Բյուրեղ 5լ ապրանքատեսակների արտադրության համար: Մաքուր Ջուր 18.9լ ապրանքատեսակը շշալցվում է Կաթնաղբյուրին մոտ գտնվող Ակունք գյուղում, Մուլտի Ակվամարին ընկերության գործարանում՝ ՄԳԱ Վոթըր ընկերության կողմից վարձակալված արտադրական հզորություններով: Էվրի Դեյ ընկերությունը հանդիսանում է ՄԳԱ Վոթըր ընկերության արտադրանքի էքսկլյուզիվ վերավաճառող: